الخميس، 26 يونيو 2008

جه فى بالى !!!

كتير منا اول ما يضايق ويحتار فى امر شغله اول حاجه يعملها انه يصلى استخارة ,,, ويستخير ربنا فى الامر وما اجمله دعاء الاستخارة تحس فيه بمنتهى الاستسلام حتى لو قلبك بيميل لشىء معين بس بتسلم امرك لله وبتدعى قوووى ,,,
فى اللحظات دى كتير بحمد ربنا قوووى انى مسلمه ,,, الحمد لله
وبحمد ربنا انى عارفه ان فى حاجه اسمها استخارة للاسف لاقيت ناس مش عارفنها !!
لما بفكر فى اسم الله الحق ببقى سعيده قووى انى مسلمه وانى الحمد لله مؤمنه قد ايه ربنا بيحافظ على حقوقنا حتى فى غيابنا ليه بنتحاسب لما بنتكلم على حد فى غيابه ؟؟
مع ان هو مش هيسمعنا وممكن ميعرفش !! لكن الحق يأبى ان يتحدث عنك احد بشىء يؤذيك حتى فى غيابك ,,,
لانه الحق ,,, شوفوا الود بيحبنا وممكن نكون مرتكبين ذنوب قد كده لكن برضو بيودنا
انا اعشق اسم الله الودود عايشه به حياتى :)
قال العلماء في معنى الودود: انه أصفى الحب وأنقاه.. أعلى درجات الحب. وأصفى الحب الذي ليس فيه حِقد. تستطيع أن تُحب ولكن في نفس الوقت ربما تجد نفسك قد حقدت على هذا المحبوب، أما الله تبارك وتعالى فـ حاشا وكلا، فالله أصفى الحب وأنقاه. وقالوا ودود: الذي يتودد ويُحب أولياءه وأنبياءه وعبادهُ الصالحين. وقالوا الودود: الذي يُحَب وهنا العكس.. فهو الذي يُحبه عباده الصالحين من ملئ قلوبهم، فيملئ حُبه سمعهم وبصرهم وقلوبهم وجوارحهم ودمائهم وأرواحهم فيكون أحب إليهم من أنفسهم وأولادهم وكل ما في الأرض,,,
احنا المسلمين حياتنا كلها استسلام لقضاء الله وقدره مهما شفنا فيها بعقلنا القاصر لكن بنسلم امرنا لله فى الاخر وبيساندنا القران(( وعسى ان تكرهوا شيئا وهو خير لكم ))
ازاى المسلم ميكونش سعيد وربنا سبحانه وتعالى يتولى امره كله مش بس الامور الظاهرة لا كمان الباطنه التى لا يعلم عنها بشر ,,, مش معنى كده انه يكون سلبى ويقول خلاص لا المسلم ايجابى الى ابعد حد همته عاليه ولا نرضى الا بتحقيق الهدف يعنى علينا السعى دائما ومش شرط ننجح طالما مع الله فى كل وقتنا يبقى امرنا كله خير
الحمد لله حمدا كثيرا طيبا مباركا فيه ملىء السموات والارض وملىء ما بينهما :))
بناتى,,, الى بيعلمونى مش انا الى بعلمهم حبيت فيهم حاجات كتير اولها انهم بيفكرونى بنفسى زماااان بس ملقيتش حد شقى زيي كام مرة كنت هموت وانقذت باعجوبه وتهت وكانوا هيودونى دار ايتام :)),,, عشت حياتى ,,, ما علينا
بس كتير بحس فيهم بمجاهده فعلا مجاهده ,, الدنيا من حواليهم صعبه جدا والفتن تخنق وهما بيجاهدوا نفسهم وخصوصا انهم فى بدايه المراهقه مرحله خطيرة وكل التاثير فيها الله المستعان ,,,
بصراحه انا وجهه نظرى فى ان طالما الانسان بيجاهد نفسه جوه الاطار يبقى مفيش مشكله انه يشد على نفسه ويرجع يرخى تانى ويرجع يشد وهكذا طالما انه داخل الحدود يبقى احسن ما ينحرف مهما كان واكيد الى بيعمل كده هدفه انه عايز يرضى ربنا باى شكل ,,,
العلاقات الانسانيه بقت بالنسبه لى محيرة جدا كنت وضعت ناس فى اطار واكتشفت انهم اكبر بكتير واحلى واجمل من الاطار الى وضعتهم فيه ,, وناس تانيه الاطار كان كبيييييييييير قووى عليهم بس الحياة بتعلمنا كتير بتجاربها وخبراتها سبحان الله ربنا بيدى كل انسان خبرة فى حياته علشان هيستعملها قدام فى حاجه اهم وممكن ينجح بيها بصرف النظر بقى الخبرة مؤلمه او ممتعه :))
مش عارفه اقول للاسف ولا اايه بس بحس بالناس قووى والى عايزين يقولوه والى بيفكروا فيه وافضل اكدب نفسى واكدب نفسى لحد ما اخد على دماغى بس فى الاخر بيطلع احساسى صح ,,, ليا صديقه غاليه عليا قوى فضلت تنصحنى وتقولى صدقى احساسك صدقى احساسك ووالله فعلا عملت كده وبقت يااه على يقين واكتشفت انه نفع :))
عمرى ما اقتنعت بالمدونات وحتى الان على فكرة ,, لكن الى بيخلينى اكتب فكرة ان فى ناس معرفهاش ولا عمرى شفتها بيردوا عليا :))
وحاجه كمان ,, بكتشف حاجات جديده فى الناس الى عارفنى :))
بتعجبنى جدا الفكرة دى ,,,
تمت

هناك 10 تعليقات:

بذرة امل يقول...

اول تعليق
بجد بجد بجد
انا فى جزء من الخاطرة دى كنت محتاج اوى
وطبعا الخاطرة كلها جميلة
امر المسلم كله خير
فعلا والله ..... نفسى اعيش بالمعنى
ودائما بذكر نفسى بيه لكنه محتاج مجاهدة نفس كبيرة
انك تقتنعى ان كل حاجة مش ليكى يبقى ربنا مش كاتبهالك
بس مع الصبر والمجاهدة والدعاء
ربنا بيلهمنا بالشعور ده والى بلاقيه واضح اوى فى دعاء الرسول صلى الله عليه وسلم
اللهم انى عبدك بن عبدك بن امتك
ناصيتى بيدك ماضى في حكمك عدل فيقضاؤك
الى اخر الدعاء
وجزاك الله خيرا كثيرا وقدر لكى الخير

يمنى يقول...

التدوينة كلها جميلة فعلا

من أول الاستخارة .... و الحمد لله اننا مسلمين ... و عارفين ديننا .... و كمان لو وقعنا او زللنا .... في ناس بتحبنا بترجعنا تاني .... كلنا بناخد بايد بعض

أسماء الله الحسنى .... ان دلت على شيء ... فهي تدل على عظمة الخالق

أقولك حاجة ... عندما أفكر في الله سبحانه و تعالى ... و عن الله سبحانه و تعالى و انه كيف يكون هناك إله ... خلق كل هذا .... انظر فقط الى يدي و احركها امامي ... و استشعر عظمته سبحانه و تعالى

بالنسبة لبناتك .... ربنا يخليكي ليهم ... و يكون بمثابة ولد صالح يدعون لك ... ان شاء الله .... و اكيد الحياة كلها تبادل خبرات بغض النظر عن السن
(اطلبوا العلم من المهد الى اللحد )

أخر حاجة بالنسبة للأشخاص الذين تعرفتي عليهم في حياتك ... فنصيحتي لك ( أحب حبيبك هونا ... و أبغض عودك هونا ... فقد هلكت أقوام في الحب .. كما هلكت أقوام في البغض ... فحبيبك ممكن أن يكون عدوك غدا ... و عدوك يمكن أن يكون حبيبك غدا )

في النهاية ..... خواطر جميلة جدااا ... و لا عجب أن تخرج من شخصية راااائعة مثلك

صالح سعيد يقول...

مرحبا فى عالم التدوين الرائع
وانا كنت زيك كده مش مقتنع بالعالم ده
لكن رايى اتغير بالتواصل مع الناس الحلوه
وصدقت فعلا ان المستقبل للتدوين مش لحاجه تانيه
ويكفى انه عامل زى الجرنان اللى بيبقى ملك الواحد
انت المحرر ورئيس التحرير كمان
وخدى بالك لانه فى منافسه شريفه شرسه فى انتظارك
لازم تتعبى اوى عشان تكونى ادها
تحياتى

راحــله يقول...

بذرة امل ,,,
ربنا يبارك فيكى وببقى سعيده بتعليقاتك الى بتكون من القلب بجد ,,, ادام الله الحب بيننا :))

يــمنى ,,
ياااااااااه نورتينى جداا واتمنى زياراتك تتكرر كتييير وتتحفينا بتعليق من تعليقاتك الجاااامده ,,
نصحتك ان الواحد يحب بشويش ويكرة براحه بدأت فعلا اطبقها فى حياتى بس بفضل الله وحده ليس لى اعداء ولكن اختلافات فى الوسيله او الغايه وبدات ايضا التمس الاعذار والله المستعان:)

الاخ الفاضل /صالح سعيد ,,
شرفتنى زيارة حضرتك جدا...
بالنسبه للتدوين كتير فكرت ابطل بس الى بيحمسنى اصدقائى وهدف اخر بجانب الفكرة الى قلتها ,,,
فى كل الاحوال هى تجربه والله الموفق لنا ولكم :)

تسعدنى زيارتكم دوما :)

blue-wave يقول...

عاجبنى اوى طريقه سردك للكلمات
تحياتى بجد

شيماء زايد يقول...

الحمد لله اننا مسلمين
اد ايه خاطرتك صادقه وجميله
ربنا يبارك لك ويبارك فيكي

HANY YASSIN يقول...

السلام عليكم
كلامك جميل اوى
الحمد لله على كل النعم والها طبعا اننا مسلمين
شرحتى حاجات جميلة باسلوب رائع
تحياتى لك
هانى يس

Ghada , Rofayda يقول...

انا دخلت كزا مره و قرأت البوست اكثر من مره....وكل مره معرفش اعلق واقول ايه..؟!!!! ..ولا ايه..؟!!!!

البوست راااائع ....وارجوا ان تعذري عدم بلاغتي في التعبير عن جماله....

تحيااااااتي

دمت بخير.....

راحــله يقول...

blue-wave ,,
جزاك الله خيرا ,,, شرفتنى

شيماء زايد,,
تسعدنى زيارتك دوما ومتابعتك الرائعه اعذرى عدم متابعتى بس والله مشغوله فعلا ربنا يبارك فيكى :))

الاخ /هانى يس
اول زيارة لعلها لا تكون الاخيرة ربنا يبارك فى حضرتك ,,الحمد لله ان ربنا قدرنى ووصلت الفكرة الحمد لله :)


غاده ورفيده ,,
وجودكم معايا هو احلى تعليق بالنسبه لى وطبعا مش اروع من البوستات تبعكم :))
دمتم بالف خير

يمنى يقول...

ممكن حضرتك تدخلي تشوفي الاعلان الموجود على مدونتنا

ولو أمكن ... تنزليه عندك في المدونة

http://khadega2000.blogspot.com/