ان تفـقد..وان تفـتقد..

ان لا تثق ولا تدرى.... ثم تنتقل الى الثقه وانت خائف

ان يطرق بابك المغلق فلا تفتح وحين تفتحه تجد الزائر قد رحل !!

ان لا تتصور ان ذاك الشىء العظيم جدا المدعو الثقه حين تعطيه تفتقده

ان تنتظر الى الابد حتى ان الابد صار ابدا!!

ان تقطع ذاك العهد مع الكرامه والكبرياء وفجأه تنحنى دون قصد وبعدها تندم اشد الندم

ان لا تعرف الفرق بين الصدق والخيال ؟!! وربما الجنون وتقرر انه الوهم

ان تترك دون وداع وترحل دون ذكرى وتقف فى مفترق الطرق اتقبل الرحيل ايضا ام تنتظر الى الابد الذى لا ياتى؟؟

ان تصرخ فى بضع سنتيمترات تهتز فى الدقيقه 70 مرة فلا يسمعك احد !!

ان تحـتار فلا تخـتار ولا تتـقدم

ان يعتقد عنك انك بالوهم باقى وعليك الانتظار !!

ان تــفـقـد ... وان تفـتقـد .....

شفت بعينى !!!

يشرفنى انى اكون واحده من المشتركين بحمله حمايه ((اوقف المخدارت .... غير حياتك)) ((فى امـــل ... فى تبطيل )) الحمله الى بيوجهوا فيها المدمنين الى عايزين يتعالجوا( وكلهم عايزين يتعالجوا ) لمراكز علاج اتفقوا معاهم على ان يكون العلاج مجانا او بخصم حسب الحاله .. وبالفعل تم طبع بوسترات ثم انطلاقنا لتلصيقها فى كل مكان واستهدفنا اكتر الاماكن الى ممكن يتواجد فيها اعلى نسبه مدمنين ... ومنها القريه الى نزلتها اليوم مع فريقى ... وشفت بعينى !!!

شفت بعينى مش كلام احصائيات ولا تلفزيونات شفت بنفسى شباب ضاااايع ضااايع بمعنى الكلمه كنت هبكى كتييير مش بس من شكلهم لا من لهفتهم اول ما يسمعونا واحنا بنقول فى امل فى تبطيل بالظبط زى الغريق الى ما صدق لقى القشه الى هتنقذه نظرات عنيهم كلها فرحه حزينه كانهم عايزين يصدقوا وخايفين .....

واحد قالى يااه احنا محتاجين عربيه تشلونا فيها قلتله اتصل ومتترددش وجمع اصحابك واتصلوا واحنا نجيلك لحد عندك انا شفت فى عنيه دموع شفتها والله ....

حسيت ان فى منهم كان شايفنا قدامه حلم وخايف يصحى منه شفت ناس مسكه الموبيل ومعرفش بتنقل الرقم ولا بتتصل مكنتش اتخيل ان كل دول شباب محتاج مساعده شباب نصف ضائع وخلاص قريبا جدا هيكون ضاع فعلا ... انا بكتب وقلبى فعلا حزين حزين مش قادره انسى نظراتهم منهم كان بيضحك وبيدارى انه محتاج الورقه الى فى ايدينا لكن مش قادر يمنع نفسه جه وخد الورقه ........

والله بدون مبالغه الشباب شكلهم فظيييع وباين عليهم جدا انضم لينا طفلين من البلد نفسها وكنا لما نحس ان الشباب ده شكله مدمن نلاقى الولد جاى يقلنا على فكرة هاتوا ورقه لفلان ده بيضرب كذا !!!

يااااه يا قاعدين يا منعمين يا كل حاجه بتجلنا لحد عندنا ياااه يالى عندنا صحه وربنا بكرمه فقط والله فقط حمانا والله اعلم ولادنا هيحصلهم ايه ؟؟ تخيلت لو ده ابنى او لاقدر الله اخويا كنت هعمل ايه ؟؟ دانا معرفهمش وقلبى موجوع حسه انى لازم اساعدهم انا بدعى ربنا نطلع من القريه دى بعشرة يتعالجوا بدعى قووووى .... يارب يا رب يا رب

وحسبـــنا الله ونعم الوكيل

اخــر شخبوطه

4 طووول محنا عايشين بنتعلم ومهما افتكرنا اننا وصلنا برضو لسه موصلناش ... دى مش حكمه دى حقيقه وفى كل شىء فى كل امور الحياة طووول الوقت بتعلم ولسه فى ابتدائيه :)

فهمت نفسى اكتر فعلا واتعلمت حاجات جديده واكتشفت قد اييييييييييه اضحك عليا - هبله بقى -فاكرة الدنيا ابيض واسود واسقطت الرمادى من حساباتى وتعبت كتييييييير عقبال ملاقيت له مكان احطه فيه ؟؟ الرمادى طبعا :))

تقبلت الحقيقه بصدر رحب وقررت انى اسامح بلا حدود بصرف النظر اذا كان الشخص الى قدامى يستاهل او لا !! انا هسامح لنفسى قررت ان احافظ على هذا القلب نقى ....

اه احنا بشر واكيد هضعف فى كتير من الاوقات واتخنق بس ده اصبح هدفى ومتاكده انى بالتدريج هوصله وفعلا بدات والحمد لله انا الان راضيه عن نفسى اقدر اقول بقى انى رجعت لاول شخبوطه اول جزء خالص عدت الى انــــا الى افتقدتها كتير جدااااااا هى دى الى كنت بدور عليها بتعمل كل حاجه بحــب واذا اذانى اى شخص اسقطه تماما من حساباتى بل على العكس اعلم قلبى ازاى يتعامل بكل حب مع نفس الشخص مش نفاق ولكن فعلا تسامح ......

كل ما افكر قد ايه بنخطأ فى حق ربنا وهو شايفنا و قمه التسامح لما تغلط وتغلط وتغلط وبرضو باب التوبه مفتوح يبقى يا انا الضعيفه مش قادرة تسامحى !!!!!

عايزة اقول اننا مهما اتعلمنا لسه بنتعلم عن نفسنا الاول ثم عن العالم الى بيحتوينا لو كل واحد فهم نفسه صح وعرف يوظف طاقته صح وتمسك بالشىء الحلو الى جواه الى هو متاكد انه بيحبه هنقدر نتغير ونغير لو قدرنا نسامح بشكل مختلف يعنى منقفش كتير قدام تصرفات الاخرين ونقول ليه ؟؟

هنفهم كل شىء بهدوء وهنقدر نفرق بين القلب الصافى الى بيحبنا بجد وبين الى نص نص والى مبيحبناش ......

اخرتها ايه؟؟؟ اخرتها والى وصلنى لكده يمكن يكون هدف من اهدافى هو انى قدوة شئت ام ابيت انا بنتمى للاسلام انا مسلمه اذن فانا قدوة لغيرى مسلم وغيرمسلم ليــه؟؟

لان كل مسلم قدوة ومرجعيتنا ----> يا ترى ربنا يقبل الى بعمله ولا لأ؟؟

احيانا بزهق من القدوة لكن لو كانت طبيعتى هى التخلق بخلق اسلامى لو عودت نفسى على كده لو قدره افهم نفسى انه ده دورى مش هتقمص شخصيه مش بتاعتى يبقى مش هزهق...

اهم حاجه انى مكنش فتنه يعنى من برة زى اسلامى وشكل مسلم وكلام وخطب ومن جوه قلب مخوخ وفاضى وتعاملات مش بشريه ابدا

بيأذينى جدا الى شكلهم متدين وجواهم منيل يااااااااااااه قد ايه بضايق:(

المرة دى شخابيط بجد كتبت كل الى جه على بالى مش عارفه وصلت الفكرة ولا لأ ؟؟

اتمنى ...

اخرتها

يا اهلى بغزة لكـــم الله

اعتذر لم اكتب منذ فترة ولم اكمل الشخابيط

بسبب ما يحدث فى غزة

حسبنا الله ونعم الوكيــــــــــل