الثلاثاء، 18 مارس 2008

شفت بعينى !!!

يشرفنى انى اكون واحده من المشتركين بحمله حمايه ((اوقف المخدارت .... غير حياتك)) ((فى امـــل ... فى تبطيل )) الحمله الى بيوجهوا فيها المدمنين الى عايزين يتعالجوا( وكلهم عايزين يتعالجوا ) لمراكز علاج اتفقوا معاهم على ان يكون العلاج مجانا او بخصم حسب الحاله .. وبالفعل تم طبع بوسترات ثم انطلاقنا لتلصيقها فى كل مكان واستهدفنا اكتر الاماكن الى ممكن يتواجد فيها اعلى نسبه مدمنين ... ومنها القريه الى نزلتها اليوم مع فريقى ... وشفت بعينى !!!
شفت بعينى مش كلام احصائيات ولا تلفزيونات شفت بنفسى شباب ضاااايع ضااايع بمعنى الكلمه كنت هبكى كتييير مش بس من شكلهم لا من لهفتهم اول ما يسمعونا واحنا بنقول فى امل فى تبطيل بالظبط زى الغريق الى ما صدق لقى القشه الى هتنقذه نظرات عنيهم كلها فرحه حزينه كانهم عايزين يصدقوا وخايفين .....

واحد قالى يااه احنا محتاجين عربيه تشلونا فيها قلتله اتصل ومتترددش وجمع اصحابك واتصلوا واحنا نجيلك لحد عندك انا شفت فى عنيه دموع شفتها والله ....
حسيت ان فى منهم كان شايفنا قدامه حلم وخايف يصحى منه شفت ناس مسكه الموبيل ومعرفش بتنقل الرقم ولا بتتصل مكنتش اتخيل ان كل دول شباب محتاج مساعده شباب نصف ضائع وخلاص قريبا جدا هيكون ضاع فعلا ... انا بكتب وقلبى فعلا حزين حزين مش قادره انسى نظراتهم منهم كان بيضحك وبيدارى انه محتاج الورقه الى فى ايدينا لكن مش قادر يمنع نفسه جه وخد الورقه ........
والله بدون مبالغه الشباب شكلهم فظيييع وباين عليهم جدا انضم لينا طفلين من البلد نفسها وكنا لما نحس ان الشباب ده شكله مدمن نلاقى الولد جاى يقلنا على فكرة هاتوا ورقه لفلان ده بيضرب كذا !!!
يااااه يا قاعدين يا منعمين يا كل حاجه بتجلنا لحد عندنا ياااه يالى عندنا صحه وربنا بكرمه فقط والله فقط حمانا والله اعلم ولادنا هيحصلهم ايه ؟؟ تخيلت لو ده ابنى او لاقدر الله اخويا كنت هعمل ايه ؟؟ دانا معرفهمش وقلبى موجوع حسه انى لازم اساعدهم انا بدعى ربنا نطلع من القريه دى بعشرة يتعالجوا بدعى قووووى .... يارب يا رب يا رب
وحسبـــنا الله ونعم الوكيل

هناك 7 تعليقات:

Ahmed Al khashab يقول...

بارك الله فيكم و نصركم دائما

سمية-بنت البنا- يقول...

السلام عليكم ورحمة الله وبركاته


اختي الفاضلة ..

جعل الله عملكم هذا بميزان حسناتكم


وبارك الله فيكم

راحــله يقول...

الاخ /احمد الخشاب
اللهم آآمين ... اسعدنا زيارتكم جدا

اختى الفاضله سميه بنت البنا
الله يعزك ويتقبل منا ومنكم .. شرفتينى واتمنى زيارات اخرى :)

yasmin al-ashry يقول...

أولا أحييكي على عرضك للبوست
اعرفك بنفسي .. انا من احدى المشاركات في تغطية حملة حماية أسرة صناع اليحاة - صيدلة المنصورة - .. وأنا بجد مصدقة كل الي انتي بتقوليه .. لأني انا برده شفت بعيني ومحدش قالي ..
الحملة لاقية صدى رهيب عند الناس كلها .. متتخيليش مدى فرحتنا لما بنلاقي البوستر متعلق في كل مكان .. الناس كلها بتتكلم عن الحملة .. الناس كلها عايزةى تشارك .. حتى المدمنين !! .. لأول مرة بلاقي المدمن حابب يشاركنا .. ولكنها مشاركة مختلفة شوية .. يشاركنا في اننا ننجح .. يشاركنا في تحقيق الهدف من الحملة وهوا انه يتعالج
..
يجد بشكرك وياريت تكون دي بداية تعاون بينا في الحملة وغيرها .. سررت بمروري ..

راحــله يقول...

ياسمين
شباب المنصورة فخر لشباب مصر كلها ربنا يحميكم ويتقبل منا ومنكم :)

mohammed alsha3r يقول...

ماشاء الله

بارك الله فيكم


ياريت تشرفونا عندنا المشاركات فى الحمله بالصوت والصور

غير معرف يقول...

يا الله

أحبك لأنك قربتنى من هذه القلوب الرحيمة

وأحبك لأنك سلمتنى طريقهم

وجعلتنى منهم

وازددت شرفا وعزا وحياة

أختى..

أنتى أهل لكل ذلك..ومبارك عليكى الثواب