الاثنين، 21 أبريل 2008

فى ظل عرش الرحمن ..

رائع جدا ان تقضى وقتك وسط مجموعه من الملتزمين فاهمين الالتزام صح بيعبروا عنه صح بزيهم واخلاقهم وسلوكهم,,,, وكل ما كان عددهم اكبر كان الاحساس اروع...
قدر لى حضور الحفل الختامى لحمله حمايه ((اوقف المخدرات ..غير حياتك)) ,, احساس اكثر من رااائع حفله على الطراز الاسلامى اول مرة احضر حفله اسلاميه غير الافراح :)
قبل ما نبدأ جه ميعاد صلاة الظهر وطلع واحد من الشباب يأذن بصراحه وبدون مبالغه وبشهاده الجميع سمعت اجمل اذان سمعته فى حياتى,,,, بعدها وتلقائى جدا توجهنا كلنا شباب وبنات للمسجد وصلينا جماعه وعلى دفعات لان عددنا كبير جدا شعورجميل بالالفه والحب المتبادل بيلغى كل الحدود والمسافات الى ممكن تفصل بينا فى الواقع .....
فقرات الحفل كانت بسيطه وجميله (قرآن /وكلمه لكل منظمين الحمله وعلى رأسهم ا/عمرو /ثم المفاجاه التى كادت ان توقف قلبى المنشد الرااائع يحيى حوى شارك بالحفل وغنى اغنيه للحمله جميله جدا /ثم المنشد محمد عبد العظيم وصوته الرائع وتفاعلنا معاه جدا جدا :) كان مشهد جميل جدا لما قاموا الشباب ومسكوا ايدين بعض على كلمات الاغنيه احنا كلنا ايد واحده ايد لوحدها متسقفش ) ,,,, قعدت اقول لنفســى,, ,,الله.... محنا ممكن نعمل حفلات محترمه واسلاميه ومنغضبش ربنا فى حاجه ونتبسط و نتفاعل مع المنشد زى الحفلات التانيه اياها طبــعا مع الفارق الفظييييع ,,, والاحساس الراائع الى احتوانى هو احساسى بهذا الحشد الرهيب من الشباب الملتزم الجاد الى فاهمين صح احسبهم على ذلك ولا ازكى على الله احدا ,,,
قد ايه القلوب دى متحابه فى الله ولله فقط احنــا عارفين اننا ممكن منشوفش بعض تانى فكنا بنسلم على بعض ونقول ان شاء الله نتقابل على باب الجنه ان شاء الله اشوفك عند حوض النبى صلى الله عليه وسلم اللهم آآمين ,,,,
شوق غير عادى لناس اول مرة تشوفهم فى حياتك جمعنا حب واحد وهدف واحد ... المكان كله حب والوجوه كلها سعاده و فرحه جميله بتحقيق الهدف ... اليوم كان راائع ربنا يبارك فيكم حستها قوووى نحن ابناء خير أمــه اخرجت للناس....
ا/عمرو
جزاك الله كل خير وجعل كل خطواتنا فى ميزانك ورزقنا واياك الاخلاص ثم الاخلاص والقبول

هناك 10 تعليقات:

بطوط حبوب يقول...

أ عمرو هو عمرو خالد؟؟!!
ربما للكلام كلام اخر ولكن ليس الان وليس هنا

راحــله يقول...

بطوط حبوب ..
فعلا هو عمرو خالد ...
اخى الفاضل انا لن ادافع عن عمرو خالد او غيرة من الشخصيات التى تحاول انقاذ ما يمكن انقاذه بافكار قد تكون صحيحه وقد تكون خاطئه فكل يؤخذ ويرد منه وعليه ولكننى اؤمن بان المسلم واعى وفاهم ويدرك جيدا من قدوته وما دليله ... ومؤمنه ايضا باننا كالنحل الذى يجمع رحيقه من كل الزهور ليصنع فى النهايه عسل واحد ....
ما اقصده هو خذ ما يعجبك واترك ما لا يتماشى مع مبادئك وقيمك لست مع من يتبعون شخصا بعينه ويسلمون بكل ما يقول ويفعل دون ادنى تفكير ينسون انه بشر وكل البشر يخطىء ...

اسعدنى مرورك :)

بذرة امل يقول...

ما شاء الله فعلا الحفلة كانت رائعة
وعجبنى اوى انها فعلا كان فيها قدر من التزام وده شىء جميل
عجبنى ردك جدا على بطوط
جزاكى الله خيرا

3abdallah 7osni يقول...

الاول نشكرم على زيارتكم الكريمة لمدونتى

بالنسبة للحفل انا كنت هاحضره لكن كان فى حاجات تانية

فعلا احساس جميل جدا انك تعيشي بحرية وحفلات وكل حاجة لكن بشرط الا يغضب الله

ونحط تحتها 100خط الحفلات موجودة والمنشدين الاسلامين موجودين ماشاء الله وصوتهم مؤثر لكن الناس مابتحاولش تدور على بديل اسلامي ملتزم

ربنا يتقبل منكم ومن أ/عمرو

وانا قرأت رد الاخ ((بطوط))

خبيب يقول...

يللا ..

مش هاحقد

---

ربنا يكرمكم

ويوفقكم

نور يقول...

يااااااه

اسقاط رائع

جميل ذكر موضوع الالتزام هنا

يا أختي الحبيبة بجد انا بحبك في الله بحس انك فاهماني ومعايا ع الخط دايما

ربنا يبارك فيكي ويكرمك ويرزقك سعادة الدنيا والاخرة

nonoymm يقول...

انا كمان زي اخي خبيب مش هحسد
حلو اوي ياريت بس الناس تفكر كدة وتعررف ان ممكن ننبسط برضه من غير ما نغضب ربنا
تحياتي

sasatifa يقول...

عمرو خالد لو ماكنش داعية اسلامى فهو مصلح اجتماعى من الدرجة الاولى ويكفي حجم البنات اللى اتحجبت والشباب اللى ربنا استخدمه عشان يكون سبب لهدايتهم ...بس خلونى اقول اللى انا كنت داخل اقوله ..أيه..اه...طب ما كنت تقولى يا انى راحله يمكن كنا نروح احنا كمان
بس جزاك الله خيرا ان انتى نبهتى الناس للحفلات الجميلة

اوعى تفكر يقول...

يا سلام
ياريتنى كنت معاكوا
حملة حمايه
نجحت بطريقه رهيبه
لدرجة ان عندنا فى المعهد اول مره نعمل اسره محترمه
وليها هدف
اسمها اسرة صناع الحياه
احنا كمان عندنا فى المعهد علقنا البوسترات
ونظمنا حفله كبيره
جه فيها مجموعه من الدعاه
واتكلمنا عن خطر التدخين والمخدرات
والشباب تفاعلوا معنا
فجزاه الله خير أ/عمرو
والشباب المشاركين فى الحمله
صحيح
الى اين انتى راحله؟؟؟؟؟؟؟
وراحله ليه؟؟؟؟؟؟؟؟؟؟

راحــله يقول...

بـذرة امــل
نورتينى ,, انتى كمان كتبتى عن اليوم بشكل جميل جدا :)

عبد الله حسنى
يشرفنى يا فندم زيارة مدونتك واسعدتنى جدا زيارتك .. حضرتك كاتب قرات رد الاخ بطوط ؟؟

خبيـب
الحفله خلصت فحضرتك ممكن تحقــد برااحتك :)

نــور
اختى وحبيبتى فى الله وحشتينى جدا ودائما لكى اضافات مميزة :)

nonoymm
هى الفكرة موجوده اننا ممكن نتبسط من غير ما نغضب ربنا ولكن كنت اتخيل التطبيق صعب بنسبه معينه لكن الحفله غيرت الاعتقاد ده الى ان الموضوع سهل وبسيط ورااائع :)


sasatifa
فعلا عمرو خالد لو مش داعيه يبقى مصلح كل واحد على حسب اعتقاده وتفكيرة وانا اقبل الاعتقادين المهم ان النتيجه واحده انى هأخد منه الى يتناسب مع مبادى وقيمى واترك ما لا يتناسب بظرف النظر بقى اذا كان كل كلامه صح بالنسبه لناس وكل كلامه غلط بالنسبه لناس تانيه مش دى نقطه النقاش ...
ليه؟ علشان نعمل زى النحله :)

شرفتنى ومدونتك جميله

اوعــى تفكــر

مــا شاء الله مبروك على الاسرة ربنا يدمها صالحه عليكوا :)
ان شاء الله الحفله الى جايه تحضرها بامر الله ..
راحله لان الدنيا رحله والمستقر معروف والفرق بينا العمل :))